حضانه اطفال
انا مدرسه ف حضانه انترناشيونال مكان كويس وليه وضعه وكل حاجه .... انهارده ف الكلاس اللى جنبي بنت حلق بتاعها مش موجود ف ودانها مامت البنت جت تستلمها ملاقتش الحلق طبعا سألت فين ومحدش كان واخد باله هى اصلا الصبح جت بيه ولا لا ومامتها بتأكد انها جت بيه وكمان موقعش برا الحضانه ولا اصلا ينفع يقع لأنه بيتفك بصعوبه ولو وقع يبقى مش هيقع الفردتين مره واحده المهم الميس بتاعتها قالت مشوفتش وكمان لسوء الحظ البنت انهارده نامت ووقت التصوير متصورتش علشان نشوف هى فعليا جت بيه او لا ... احنا عندنا مواعيد يعنى مثلا جروب بيمشى ٤ وجروب بيمشي الساعه ٥ انا كنت بمشى الساعه ٥ والتانين بيمشو ٤ ومن ضمنهم النانى بتاعت الكلاس بتاعى المهم مامت البنت قالت لا معلش الموضوع مش حلق الموضوع أمانه انا سايبه بنتى لازم اكون مطمنه انا هعمل محضر والكاميرات تتراجع المديره قالتلها انا هدور تانى وهاتيلى الفاتوره هدفعها انا واعتذرتلها ووعدتها هتراجع الكاميرات وتكلمها ده بعد مالمديره أكدتلها الناس هنا قد ايه امينه وكويسه .... طلعت المديره عندى وسالتنى البنت مجتش عندك قولتلها جت بس بعدها ب ربع الساعه مشيت قالتلى طب ندور بردو قلبنا الكلاس عندى مفيش قالتلى انا كده هدفع تمنه قولتلها لا طبعا انتى تراجعى الكاميرات ونتأكد هى جايه بيه ولا لا وسابتنى ونزلت وفعلا راجعت الكاميرات لاقينا مفاجأه انه .......
ندهتلى ورتنى الفيديو وقالتلى تقوليلها ترجعه حالا هعمل محضر فيها بالفيديو ده قولتلها طب اهدى وكلمتها قولتلها حصل كذه والفيديو مش هينصفك حتى لو مخدتيهوش دخولك بدون داعى وقعادك كده بردو هيقول انك انتى صارحينى راحت معيطه وقالتلى هقولك بس تسترى عليا ومتخليهاش تمشينى وقعدت تقولى والله اول واخر مره انا معرفش عملت كده ازاى انا تعبت جوزى مش شغال ومستلفه منك ومن غيرك ومن ابويا وفضلت
خلتنى عيطت حرفيا لأنها فعلا طيبه وانا مستغربه عملت كده ازاى قولتلها هاتيه وتعالى ومش هنعرف حد وهنلم الموضوع مع المديره وفعليا جت وخرجت برا جبته منها وادته للمديره ولما خرجت بردو لاقتها مڼهاره خلتنى فضلت اعيط دخلت للمديره قولتلها رجاء شخصى سامحيها هو اللى حصل حرام وعيب ومينغعش وكل حاجه بس كلنا بنغلط بدرجات متفاوته ولو عندك القدره تعفى عنها وتسامحيها ياريت والقرار ليكى تمشيها او تخليها . سؤالى انا كده مش شايفه الموضوع صح يعنى اسكت متكلمش تانى علشان اخليها متقطعش عيشها وتسامحها ولا اعمل ايه انا مستنيه اشوف التعليقات على انا كل ماافتكر منظرها تصعب عليا واعيط معرفش انا صح ولا غلط.
تمت..
